1994: Grënnung

De Grupp Fiiss um Zens gouf 1994 vun der FNEL mat der Hëllef vun der Melusina-Trupp vun der AGGL gegrënnt. Ufanks hunn déi Fiiss nëmme Jongen opgeholl, wärend d'Melusina-Trupp fir d'Meedercher reservéiert war. Déi zwou Gruppen hunn ënner dem Numm Melusina-Fiiss gemeinsam Aktivitéiten organiséiert, mat gedeelte Cheffen, mee all huet hiren eegene Foulard, Uniform, Komité an och Affiliatioun bei zwou Federatiounen behalen.

1996: Wuesstem

1996 hat de Grupp 41 aktiv Memberen. "De Fiisschen", d'Zeitung vum Grupp, gouf fir d'éischt erausbruecht an kënnt zanterhinnen reegelméisseg eraus.

2000: Fusioun mat den Etoiles Européenes

Am September 2000 huet sech de Grupp mat den Etoiles Européenes zesummegedoen, méi Scouten a Wëllefcher kritt an ass méi international ginn.

2005: Paus

Leider huet e Mangel u Cheffen dozou gefouert, datt de Grupp keng Aktivitéiten méi hat no 2005.

2013: Neiufank

An der Tëschenzäit sinn sech déi zwou Federatioune méi no komm an d'AGGL huet hiren Terrain um Zens der FNEL zur Verfügung gestallt fir en neie Sëtz ze bauen. Den alen a baufällegen Chalet vun de Melusina huet der neier Konstruktioun misse Plaz maachen, ënner der Konditioun datt e Sall fir e lokale Grupp misst virgesinn sinn.

Bei der Aweiung vum FNEL-Sëtz am Mee 2013 gouf de Grupp mat der Wollefslbranch stolz nei gestart, ënner der Leedung vun zwou professionelle Cheftaine vun der FNEL.

2015: Scoutsbranch

Wéi d'Wëllefcher méi al goufen, gouf am September 2015 eng Scoutsbranch opgemaach.

2022: Explorerbranch

2022 gouf d'Explorerbranch derbäigefüügt, domat ass déi aktuell Struktur vum Grupp komplett.